أم نزار اخترعت على بنتها دلول..،ودقت عليها
دلول ردت على أمها قالت لها:
يمه أنا لين ألحين ما صوت..،احنا فوق الخمسين وحده ما صوتنا ننطر دورنا..امسكرين علينا باب الاقتراع
بس يمه لا اتحاتين ..أنا الحين اصوت وارجع
الأهل اقعدو ينطرون دلول..، وصارت الساعه 9 ولين ألأحين ما ارجعت!
البنات دقو على دلول تيلفون يقولون لها:
دلوول شتسوين ؟!
تفرزين الأصوات معاهم!
دلول تضحك..لا والله بس زحمه وألحين يجيني الدور انشاء الله..
وبعد نصف ساعه ارجعت دلول حدها متليشه..اتعورها اريولها واتعبت من الوقفه
البنات يضحكون عليها ويتشمتون فيها:
قلعتج.....محد قالج اتروحين متأخره
دلول اترد عليهم:
عادي ما ضرني..
أنا طول الوقت قاعده أسولف مع جواهر..
البنات مستغربين:
منو جواهر؟!!!
دلول:بنت عم أمي
البنات: ههههههههههه
بنت /عم /أمج !!
ما شاء الله!
من وين لقيتيها هذي؟
دلول:أووووه أشفيكم..لا تتطنزون
والله شحليلها ونستني
ارتاحت دلول بعد النطره وعقب ما ارتاحت شالت شلايلها وقامت:
يالله يا جماعه..
مع السلامه
أنا بروح بيت خالاتي انتابع نتايج الانتخابات..
أشوفكم على خير
البنات اقعدو يتابعون نتايج الانتخابات مع عماتهم وحريم عمامهم..وطاقينها سوالف وضحك ..
زوجة العم أم فروحه قاعده أتسولف مع أم نزار اتقول لها:
أنا زوجي شاريلنا حب امدخن..
بس مو حلو.. ما عجبنا
ردت عليها أم نزار : وييييه ما عندج سالفه؟!!
اشحلاته يهبل!
أم فروحه: خلاص عيل إذا تبونه أنزله لكم تاخذونه
قمره كانت قاعده بينهم وأول مره تسمع ابشي اسمه حب امدخن..، واقعدت تسأل روحها بعد في حب يدخن!..أنا ما أعرف الا الحب الشمسي..
أسألت قمره أم نزار وقالت لها:
خالتي أم نزار الحب لمدخن هذا ..كان حب شمسي وبعدين دخن؟
أم نزار:كاااااااااااااااك ككك
تعالي يا أم فروحه شوفي قمره شنو اتقول..
لاوانتي الصاجه هذاك حب شمسي وهذا حب قمري هههههههه
قمره: !!..لا والله من صجي..
شنو الحب لمدخن؟!
أنا أول مره أسمع فيه..
يعني هذا حب تحمسونه؟
أم نزار لايا حبيبتي..هذا الله يسلمج حب اييبونه جاهز من المطحنه لونه أسود، اسمه حب امدخن
اشوي والحريم قاعدين ولا يدخل عليهم أبو قمره والعمام يبون يتابعون الانتخابات عندهم
قالت أم فروحه حق الكنات والعمات.. تعالو امشو انروح فوق احط لكم حب امدخن وحب امخلط وكازو..واسويلكم قهوة تركيه
راحو الحريم فوق والبنات اقعدويتابعون نتايج الانتخابات مع عمامهم..وهم حدهم مندمجين من صجهم ، يعني يتابعون النتايج عن كثب مثل ما يقولون
آخر الليل البنات اصعدو فوق ولا يلقون الحريم هم بعد من صجهم جدام الحب والقهوه التركيه ويتابعون نتايج الانتخابات
قمره أول ما ادخلت وشافت الحب لمدخن اعرفته من شكله وقالت:
ألحين هاااااذاا...الحب لمدخن اللي تقولون عنه؟!
أم نزار: ايه ما تشمين ريحته؟
قمره امبلا..زقاير ولا شيشه
أم نزار:كااااااااااااااااااااك ككك
يا بنت يوزي عن سوالفج..ترى ما فينا حيل نضحك هههههه
البنات ارجعو البيت يتابعون نتايج الانتخابات بالبيت..اخوهم عبد الله سمح لهم يسهرون لأن هذا يوم تاريخي والكويت كلها سهرانه اليوم..والبنات اقعدو جدام التلفزيون وبعد هم اطلبو لهم عشا...
(!!! الله يخلف علينا والبركه في اجيال ما بعد النفط انشاء الله ، ولاأقول ..أحسن شي ندعي لهم.. يا الله يا كريم تطرح في بنات هالوقت لبركه، والسامع يقول آمين)
قمره لأن ابوها امفزعها من الصبح وما فيها حيل تسهر..
راحت دارها علشان تنطر العشا..ولكن للأسف نامت بهدومها ومكياجها من التعب قبل ما تتعشا
دقت عليها اختها أزهار تقول لها:
قموره..!!..أمي دقت علينا تيلفون..قاعدين انكلمها ألحين وتبي اتكلمج..
قموره كلش ما فيها حيل تردت عليها، ردت وهي بين الصاحيه والنايمه..كأنها حلمانه:
هااا..........ما أقدر ...ما أقدر... أكلمها باجر
أزهار: انزين والعشا!.. ما تبين عشا؟
قمره: مابي....مابي.....بناااام
ونامت قمره نومه هنيه..بعد أن شعرت باهتمام خوانها زوزو وسنيه..وبعد أن سمعت طااااااري أمها..اللي ما تقدر أن تقابله من شدة التعب إلا بأن ترفع الراية البيضاااء..وتنام نومة الامراااء
..................وللحديث بقيه