الحلقه الثانيه الغيره تدب بين الأخوات...

الله يستر؛)

تعودو البنات يطلعون مع أمهم في أيام العطله وفي أغلب الأحوال يروحون نادي الضباط البحري، وللي ما يعرفه اهو عباره عن نادي بحري فيه بحر ومنتزه خاص بس حق أهالي ضباط الجيش، ومحد يقدر يدخله إلا ببطاقه عضويه أو رسوم.

(لكن الأم امسافره ألحين ..واليوم يوم الأربعاء.. شنو راح يسوون
البنات؟؟..يقعدون بالبيت!!!)


الأم من الصبح دزت مسج حق وحده من الخوات أسمها ساره،تقول فيها:
((قولي حق أبوج يقص لكم تذكرة واتيون معاي حق ديزني لاند
أنا ألحين موجوده فيه))

البنات وايد استانسو لما شافو المسج وقالو أمي يحليلها ههههه رايحه ديزني لاند!!، يا من حضهاااا

**********************************
الاخوان قاعدين بالبيت لأنهم امعطلين وما يقومون الا الظهر، وقمره واختها أزهار رايحين دواماتهم من الصبح، ولما ارجعو حطو حق اخوانهم الغدا..

العصر دزت لهم خالتهم مسج تقول لهم:
((تزهبو يا بنات بعد المغرب راح انمر عليكم علشان انروح نادي الضباط ،آخذكم مع بناتي))

البنات: هييه
والبسو وتجهزو وبعد المغرب راحو مع خالتهم وبناتها نادي الضباط
واهناك شافو اهلهم وربعهم وجماعتهم

************************
طول الوقت الحريم ما يتكلمون الا عن الانتخابات ، وتوصلهم مسجات من المرشحين ومفاتيحهم الانتخابيه،وبعض الاحيان اتصالات بعد، يدعونهم لحضور ندواتهم الانتخابيه، ويحاولون اقناعهم بالادلاء بأصواتهم، ويدزون لهم عبارات على موبايلاتهم، مثل :
شاركونا هذا المساء ندوتنا الختاميه(رسالتنا الخيره)

وعباره أخرى تقول:
اللقاء المفتوح الليله بعد صلاة العشاء بديوان......منطقه........قطعة........شارع.......من زل......

و أخرى تقول:
غدا يوم الاقتراع ويوم الاصلاح والتعبير عن حب الكويت

.....الخ من العبارات

البنات توصلهم كل هذي المسجات والاتصالات، بس هم قاعدين على اليال، ويتمشون على البحر، ويلعبون بالرمل ويشربون الشاي...والانتخابات ولا على بالهم،امطنشينهم بالمررره ههههه


الساعه 9.5 pm، الأم دزت حق أزهار مسج تقول فيها:
((اشلونج أزهار ها وين طلعتو اليوم أنا من ساعه راده البيت متليشه من المشي أقول وين أزهار اتهمزني وسلملم))


قمره لما شافت المسج هذي : شششبت :(( وعصبت !!!!! :
ليش أمي ادزلكم مسجات وما ادزلي؟؟!!!

الخوات:أحنا أول مره أمي ادز لنا، والله ،كل مره اندز لها مسجات وما ترد
علينا
قمره:مااااالي خص
أنا زعلانه هه

وبعدين دزت قمره حق أمها مسج تقول لها:
(( أنا زعلانه ليش ادزين حق خواتي مسجات وما ادزيلي، مو حافظه رقمي:(
الساعه 10.10 pm

وبعد ثلث ساعه تقريبا الأم ردت على قمره مسج وقالت لها:

((لا تزعلين يا قموره الأموره أنا ما أقدر على زعلج أنا اذا طرشت حق وحده معناها للجميع لأن ما عندي وقت))

استانست قمره بالرد وطاب خاطرها وردت لها وجه مبتسم.

(ايه هذولا الأمهات ولا بلاش،صج ان الأم اطلعت ذكيه بس على الأقل مااااشي
الحال ههههههه)


صارت الساعه 11.5 ، تعشو البنات بالنادي، ولما اطلعو من النادي بالرده اطلبو حق اخوانهم الصغار وجبات هابي ميل من ماكدونلز وارجعو البيت.

الخوات عشو اخوانهم ونامو، الا قمره وواحد من أخوانها اسمه سالم اسهرو واكسرو القوانين اللي حاطها لهم اخوهم عبد الله يتشيحط عليهم من أول ما سافرت أمهم

ولما صارت الساعه 1.5 قمره وسلوم اطلبو عشا مره ثانيا من المطعم توصيل منازل، مستغلين غياب اخوهم عبدالله، بس للأسف ماكو مطعم وجبات سريعه يوصل هالوقت بس وجبتين الا هارديز، وقمره وسالم ماااا يواطنون هالمطعم ابعيشت الله

قالت قمره حق اخوها سالم:
سلوم شنسوي نطلب؟
سالم: يووووعان حدي مو متعشي
قمره: وأنا مو يوعانه بس مالي خلق اسويلك عشا
تدري اشلون خل نطلب


اطلبت قمره وسالم وجبات وكلو وهم يتحلطمون .. على بطاطهم.. وأكلهم وينكتون بعد،لكن بس اشوي ولا يدخل عليهم أخوهم عبدالله توه ياي من بره

سالم وقمره تصروعو لما شافو اخوهم وقامو يرقعون حق بعض،ويجاوبون من قبل ما يسألهم

قمره تقول: سلوم يوووعان...
وسلوم يقول قمره قالت لي خل نطلب عشا
اتكمل قمره: بس عشاهم مو حلو..
يرد سلوم : يلوع الجبد ويعور البطن

عبدالله لما شافهم حدهم متخلبصين قال لهم:
انزين انزين خلصو عشا وروحو نامو لا تسهرون
ولما راح عبد الله قمره وسلوم قامو يضحكون على بعض ويقولون من حلات العشا يعععع استغفر الله، واحنا مع اويوهنا ما ندري اشحقا طالبين هههههههههههه




اتمنى اتكون الحلقه الثانيه اعجبتكم
وتابعوني في الحلقه الثالثه ترى
راح اتكون فيها مفاجئات ،.. لاقنابل ،الا فرقعات انتخابيه
وعلشان جذيه راح احطها عنوان ابروحها

:) إلى اللقاااااااء..