وهذا الجزء الثالث ..



فيّ: منو اهني
مايد كان واقف يناظر فيّ .. و مب عارف كيف يبدى *متوهق الريال .. أعرف أعرف أختي الجريحه إنج ذكيه*
مايد: أختي أنا مايد
*عاد ما شاء الله عليه عرف يرمس .. الحين هي شو يعرّفها منو مايد*
فيّ: مايد ؟؟ .. اسمحلي أخوي أنا ما اعرف حد بهذا الاسم
و صدت فيّ الصوب الثاني و بغت تمشي بس ..
* لا تخافن ما طاحت .. مب كل يوم العيد*
مايد: أنا اللي .. *مب قادر ايكمل .. مفتشل .. محد قالك* .. أنا اللي غازلتج و لحقتج في السيتي* زين ما مات و هو يقولها .. ما خد نفس وحليله* .. و ضحكت عليج يوم طحتي .. * لازم اتذكرها بالمأساه .. الله يهديك يا مايد *
فيّ و ويها محترق: خير أخوي .. شو تبى .. تبى تضحك أكثر
مايد: لا أختي .. والله إني قافط و مستحي على اللي سويته .. و كنت أبى اعتذر .. و ما صدقت أني شفتج
*يا الله كيف يطولونها و هي قصيره *
فيّ: مسموح أخوي .. ولا تعيدها مره ثانيه لأن مب كل مره باتيك فرصه عشان تعتذر
*امممم .. متى اعتذر؟؟ .. ما عليه ما تنلام مدوده البنت*
المهم صدت البنت بتكمل دربها .. بسسسسسسسس
مايد: يعني سامحتيني
فيّ: سامحتك
صدت البنت للمره الثالثه .. بسسسسسسسسس
* والله أخاف تيها اعصبه من كثر ما تصد .. ههه*
مايد: متأكده أنج سامحتيني
*عيبته السالفه .. مكيــّف*
فيّ و بدت اتعصب :قلت هيه .. مع السلامه أخوي
*مب زين ايعصببها .. أخاف أتطيح *
مايد: مع السلامه
صدت فيّ و كملت من غير بسسسسسسسسس

مشت فيّ اشوي اشوي .. كانت خايفه لأنها روحها .. و خايف لا يستوي مثل آخر مره .. طلعت فيّ موبايلها عشان تتصل بأختها * أدري اتقولون عميا كيف تتصل .. بس هي مبرمجه موبايلها بطريقه اتعرف كيف ادق لأهلها .. و حليلها ما امسيفه أرقام وايد .. أرقام حور و شهد و الفاملي .. يعني آخر مره كانت متصله لحور .. عشان تتصلبها الحين بس ادق مره على الدقمه الخضره .. يالسه اعلمكن على الموبايل ..لووووووووول* .. المهم ما مداها اطلع الموبايل .. إلا و تحس ابشيء يدعم جتفها

فيّ: بسم الله
مايد: اسمحيلي أختي و الله بالغلط .. كنت ألعب ويا ولد أختي و ما انتبهتلج
*علينا يا ابني .. على مين تلعبها *
فيّ: مسموح أخوي و ا متأكده أني امسامحتنك .. مع السلامه
مايد: لحظه أختي
فيّ و بتأفف: نعم
مايد: يودّي موبايلج طاح و نسيتيه
فيّ: مشكور
مايد: العفو
و مشى عنها مايد .. بس بعد ما خذ اللي يباه .. الأخ مايد اتعمد يدعم فيّ يوم شافها اطلع الموبايل .. عشان ياخد موبايلها و يدق على موبايله .. *امم .. شو يبى من رقمها ؟؟*

المهم تمت فيّ تتريا حور .. *حشى مب اسكارف * .. بعد ثلاث دقايق وصلت حور

حور: وصللللللللللللت
فيّ: توه الناس .. لا يكون سرتي تصنعيلج اسكارف
حور: ول ول .. شوي شوي كلتيني بقشوري .. وحليلي يايبتلج وياي مفاجأه .. بس أنتي ما تستاهلين
فيّ: الله شو هي * ما صدقت البنت*
شهد: بوووووووووووووووووووووو .. مب أحلى مفجأه في حياتج
فيّ: أوه .. شهووووووووووووده .. الحين هاي هي المفاجأه .. سايره مستشفى الأمل و يايبتلي هذي الخبله و اتقوول مفاجأه
شهد: و الله إني استاهل .. أوني يايتكن .. عشان نستانس .. بس أنتي طالعه مثل أخوج الدب
حور: أرجوج عن الغلط ..
شهد: هيه ما ترضين عليه بس ترضين عليّ
فيّ: ابصارحه جنكم ديج و ديايه
حور: هههه .. صدقتي
شهد: اقول .. سكتن .. تراكم وايد عطينه أهميه
حور: نحنا ولا أنتي
فيّ: هي والله أنتي اللي طريته
شهد: قومن خلن انسير ناكل تراني يوعانه
* وحليلها اتوهقت*

مشن البنات .. و طول الوقت يتغايضن و يتكعكن من الضحك .. دخلن الشاليه
حمد: أمايه وصلن ثلاث أضواء على المسرح
* الله يسلمكن .. حمد أخو حور و فيّ العود .. عمره 26 .. بس ما شاء الله عليه بيبي فيس .. و هو مكس .. ساعات يشبه حور و ساعات يشبه فيّ * مودي الأخ * .. حمد يحب يطفر بالبنات و خصوصا شهد لأنها ما شاء الله تتفاعل على طول ..
شهد: هذا هو أخوكم اللي مستانسات عليه .. ويه فديت أخوي
حمد: بنت عمي .. يقولج *رزت الفيس من طبايع التيس*
شهد: والله ما كنت أدري .. مشكور ابن عمي على المعلومه الخطيره
فيّ: بدوا
حور: والله وناسه
حمد: عيل بليز سجليها في النوت بوك .. أدريبج بقره .. تنسين ابسرعه
شهد: البقره حرمتك و أم حرمتك *عصبيه البنت*
حمد: إذا حرمتي بقره فأكيد حرمتي أنتي
شهد: بسم الله عليّ
حمد: طاع هاي صدقت عمرها
حور عقب ما حست إن الليله ما بتعدي على خير : بسسسسسسسسسس فكونا .. والله صدعنا
فيّ: أمايه زهب العشاء ؟؟
الأم: لا حبيبتي .. بعدنا ما شوينا
شهد: أي بطني .. و الله يوعانه
حمد: أمايه الحقينا .. أرجوج أنقذينا .. قبل ما ناس ياكلونا
حور و فيّ :ههههههاي
شهد: واااااي .. وايد يضحك *لو يالسه عند أهلج مب أبركلج*
وتموا على هل حال ..

*في الصوب الثاني من الحديقه*

عليا : احم احم
مايد ساكت
عليا بصوت أعلى : احمممم احممممم
مايد: وحليلج يا عليا
عليا : ليش ؟؟
مايد: الله رزقج بريل زطي .. عفانا الله يشوفج اتكحين ما فكر يوديج الدختر ..
عليا: فديت ريلي .. ما في أكرم منه .. مب مثل نااااااااس
مايد: والله أنيلا كريم .. ما اعرف الناس اللي ترمسين عنهم
عليا: عيل أرمس
مايد: والله ما دريت أنا صوتي عابينج ولا يهمج
و يغني مايد: المشكله الإحساس لو كنت صادق فيـــه .. ما هان قدرك يوم في عيون الناس .
عليا: بس .. أنته ما اتي إلا بالعين الحمره .. منو هاي البنت اللي كنت ترمسها
مايد: بااال .. و أنتي من وين عرفتي ؟؟
عليا : شفتك
مايد: ما شاء الله .. برج مراقبه
عليا: يلا انزين قوووووووول ..
مايد: الله يسلمج .. عطشان بقوم اشرب ماي
عليا: أي .. تعال تعال .. لا تتهرب
مايد: اتهرب ؟؟
عليا: قول و وعد مني أنا ايبليك ماي
مايد: انزين عن شو كنا نرمس ؟؟
عليا: اونك نسيــت
مايد: هههه .. والله إنا الحريم مشكله .. بس و الله أنا خايف عليج
عليا باستغراب: ليش ؟؟
مايد: اخاف الفضول يجتلج
عليا: هههه .. لا تغير الموضوع *ما شاء الله عليها ما تنسى .. خلها اتسلفني مخها حق الامتحانات*
مايد: الله يسلمج .. هذي هي البنت اللي طاحت في الستي
عليا: انزين ليش كنت اترمسها ؟؟
مايد: كنت اعتذر منها
عليا: هي .. قلتلي
مايد: ارتاحت دودتج
عليا و كل ضروسها برع: أكيد
مايد: انزين قومي ايبيلي ماي
عليا: حد قالك إني خدامتك
مايد: والله .. مسرع ما نسيتي وعدج
عليا: اقول .. اشرب من ماي البحر
مايد: ان شاء الله
قام مايد و خذ ولد عليا رشوووووود عمره 4 اسنين ..
عليا: وين بتوديه
مايد: بفره في البحر عشان يحليه
عليا: بسم الله .. هات ولدي .. بسير ايبلك ماي * واااااااااااق .. زاغت *
مايد: توج حرمه

أوكي خلنا انرد للحشره .. حور و فيّ و شهد و حمد و الأم و الأبو
الأبو: يلا روّحنا
الأم: هيه يا الله هلكنا .. واي تعب
حمد: و الله ما تنلامون شياب .. بس يوم بترمسون ارمسوا عن عماركم *ملسون *
الأبو: اسمحلنا عمي إذا غلطنا عليك
حمد: افاااااااا يا بو حمد .. بس لا تعيدونها مره ثانيه
الأم: ها شهوده بتباتين عندنا ؟؟
حمد: لاااااااااااااااااا .. بليز .. مب ناقص أفلام رعب
شهد و خلاص ودها اتشل النعال و تكفخه : ليش .. أنت مب ريال أتخاف .. إذا اتخاف خالوه بتم وياك
طبعا حمد بعد هذا الرد ما قدر يرمس *عطته من الزين*
الأبو: فديت بنت أخوي اتعرف اتقفط
شهد اتشققت .. و أخيرا قدرت اتسكته
الأم: ها شهد شو قلتي
شهد: والله خالوه ودّي ..بس ما اقدر
حمد: فكّه *ما يتوب*
الأبو: كله منك يا حمد .. عقاباَ لك بتوصلها بيتهم
حمد:بس أبوي
فيّ: لا بس و لا شيات .. لا تنسى أنت يالس اتكلم السلطات العليا
حور: ههههه .. كسرت خاطري .. ادبست
الأبو: ها شو قلت ..
حمد : أنته تامر أمر .. كم بو حمد عندي .. أنا ما اصدق متى تطلب مني شيء عشان أنفذه * أونه كوووووووول *
الأم: مسكا بالش
حمد: شو قلتي أمايه
الأم: سلامتك
شهد: عمي قول للدريول يلا . احم احم ما فيني أتأخر
حمد: ما أسمع
شهد: ما تسمع و لا ما تفهم .. أي راجو جلدي جلدي ..
حمد: أيوه نط العرج .. أجا شاندرا
حور: منو شاندرا و منو راجو
فيّ : الله يعين شو بيسمون عيالهم
حور: راني و شاروخ .. لول
كلهم يضحكون .. حمد و شهد يشوفون بعض و يقولون: أي ما يخصكن في عيالنا
حور: أوب أوب .. اسمحولنا
فيّ: يلا مرت أخوي انوصلج
شهد: الله لا يقووووووووول
حمد و هو معصب : تتمنين
شهد: قاص على عمرك * وش الجديد*
الأبو: يلا امشوا .. ولا ما بتوصلون منهم

في السياره .. حمد و شهد ما سكتوا كملوا ضرابتهم .. ما شاء الله جنهم بالعين راديوووو .. و حور و فيّ ميتين من الضحك .. مره يآزرن حمد أخوهن .. و مره شهد حبيبت قلبهن ..

حمد: يلا فارجي
شهد: الحمدالله و الشكر .. بسير اصلي ركعتين شكر إني وصلت سالمه
حمد: وا دعيلي إني أقدر أرقد اليوم
شهد: ليش ؟؟
حمد : تراني ما اقدر على فراقج
شهد: والله ؟؟
حمد: طاع .. صدّقت .. وين أفارقج و أنتي اتزوريني في كوابيسي ..
شهد: اقول .. بنات مع السلامه .. تراني ما استحمل
حور و فيّ: مع السلامه
حمد: اقول
شهد ساكته بس تتراياه يرمس
حمد: سلمي على ناس وايـــــــــــــــــــــــــــــــــــــــــــــــ ــــــــد
شهد: منو
حمد: على اللي تزورني في أحلامي .. أختج حصوص و يغمز لها
* حصه أخت شهد الصغيره .. عمرها 18 .. ثانويه عامه .. بس هي مب وايد ويا حور و فيّ .. دومها ويا بنات خالها .. و هي تستانس على حمد و سوالفه .. و حمد يدلعها عشان يقهر شهد*
شهد: الله يسلمك
حمد: وريني عرض كتافك
شهد: ان شاء الله

طااااااااااااااااااااااااااااااااااااااااااااااااا ااااااااااااااااااااااااااااااااااااااااااخ
*واي قلبي عورني على الرنج .. كلا و لا الرنج .. الله يعين قلب حمد *

حمد: والله لراويها
فيّ: بس يا حمد .. أنت ما قصرت
حور: هي والله دوم اتغايضها
حمد: لا والله .. لحظه
فيّ: عشان خاطري ما اتقول و لا تسوي شيء
حمد: أوكي .. اليوم ما بسوي .. مب عشان خاطرها بس لأني تعبان
فيّ: عشان تعبان .. وأنا اللي استانست قلت ما بيسوي شيء عشان خاطري

المهم تموا داقين سوالف لين ما وصلوا البيت .. عقب كل واحد سار حجرته يتنظف و يرتااااااااااااااح ..
المهم فيّ قررت تتصل في شهد عشان تطمئن على نفسيتها بعد اللي صار * هذا أذا تم لها أعصاب* .. شلت فيّ الموبايل بس قررت تتصل في حور قبل عشان يرمسن شهد و يطيبن خاطرها .. دقت فيّ ..

ترررن ترررررررررن

فيّ: حوووووووووووووووووور حبيبتي تعالي حجرتي عشان انرمس المظلومه شهوده ..

ما ترد ..
فيّ: حوررر بلاج .. لا يكون رقدتي يا الديايه ؟؟
الطرف الثاني: ألوو

فيّ يوم سمعت صوت ريال بطلت حلجها و عيونها .. و قلبها يدق مثل الطبل ..




همس العيون